Archivo de la etiqueta: orgulloCantabile

Concerto de Solistas 2019

Este domingo vivimos unha fantástica tarde de música nas Capuchinas. O concerto de solistas de Cantabile serve para que cada ano aqueles coralistas que estudan canto ou tocan algún instrumento poidan mostrar o seu traballo a un público que non terían nos seus conservatorios ou escolas. Isto axúdaos a mellorar como músicos e gañar confianza e seguridade, pero é que ademais, fainos disfrutar moitísimo!

Nesta edición tivemos nada máis e nada menos que 26 obras do máis variado. Sofía Iglesias inaugurou a tarde ao violonchelo, seguida do “Caro Mio Ben” de LeonorDespois, Romeu e Jaime emocionaron ao público coa banda sonora de Forrest Gump ao piano e o trombón, mentres que Pablo Ares ao acordeón e Silvia ao piano interpretaron ritmos de baile. Irene tamén tocou unha fermosa danza, a dos “espíritos benaventurados” de Gluck. Delicado e cheo de sentimento coma sempre, Romeu repetiu ao piano con dúas pezas. Seguiu o “A Vucchela” de Marcos, a “Aria da cantata campesiña” de Nicolás ao violín e, para concluír a primeira parte do concerto, Samuel interpretou a “Yorkshire Ballad” ao bombardino.

Cando o público volveu aos seus asentos e os artistas recuperaron forzas cuns doces –que non podían faltar– Jaime enfrontouse a tres solos de trombón, para despois unirse a Romeu, Xiana e Nicolás e cantar “Esurientes” de Vivaldi, “Wiegenlied” de Mozart e “Ceibo, ceibo zuiñandí” de Guastavino. A seguir, Marta Duckworth dedicou á súa avoa o “Nocturno nº5” de Field e Carlota, xunto coa súa compañeira Uxía, interpretou o primeiro movemento do “Concerto en Sol m para dous cellos” de Vivaldi. Miguel No interpretou a última obra para un instrumento de vento do concerto cunha sonata para clarinete de Saint-Säens, e a el seguírono os violíns de Ramón e Manuel Segade e a viola de Mara. Lucía Cernadas tocou as “Diferencias sobre Conde Claros” á guitarra, para unirse despois a Mariana no dúo “Son nata a lagrimar” do Giulio Cesare in Egitto de Händel. O ramo da noite púxoo Martín co “Con te partirò” que popularizou Andrea Bocelli, un éxito rotundo!
Antes de finalizar o concerto, Ludmila Orlova recibiu unhas flores como recoñecemento á súa paciencia e esforzo como pianista acompañante de moitos dos mozos e mozas, mentres a Sección Xuvenil se preparaba para cantar unha selección de coros do musical “Les Miserables” que, a xulgar polos aplausos, tamén foron un acerto.

Como vedes, Cantabile non para nin un momento! As nosas filas están cheas de talento ano tras ano, así que só podemos sentir orgullo e esperar con ansia o próximo concerto de solistas.

Deixámosvos cunha galería de fotos. Vémonos nos escenarios!

El pase de diapositivas requiere JavaScript.

RESULTADOS DO CONCURSO DE DESEÑO TÉXTIL CANTABILE

Xa temos gañadoras do concurso de deseño téxtil Cantabile:

Na categoría para a xente máis cativa, a gañadora foi Julia Mena Díaz.

Na categoría absoluta, resultou gañador o tándem formado por Mariana Boedo Buño e Valeria Mena Díaz.

Como mostra da calidade dos traballos presentados e como recoñecemento ao esforzo realizado, o xurado, presido por Lucía Cernadas, decidiu outorgar dous accesits ex aequo para Laura García Pereiro e Manuel Segade Bodelo.

En breve disfrutaremos dos novos deseños nos nosos uniformes.

Nadal 2018-2019 #NadalCantabile

Rematou un intenso ano 2018 cheo de compromisos e música e comeza o 2019, cargado de proxectos.

Antes de coller folgos para esta nova andadura, queremos amosarvos un resumo do #NadalCantabile 2018-2019

E comezou moi pronto. Unha das novidades deste nadal foi a participación do Coro, o 7 de decembro,  no prendido da iluminación de nadal, cun concerto xunto á famosa bóla da Marina, ateigada de xente.

O Coro Cantabile no prendido da iluminación de nadal

Continuamos  coa inauguración do nacemento artístico no Palacio de María Pita o día 14. Este ano rendíase homenaxe á poeta Luz Pozo Garza, que saudou agarimosamente aos nenos e nenas do Coro. Interpretarmos varias panxoliñas despois de que Luz Pozo nos deleitase cun poema seu.

O seguinte evento foi a nosa participación no XI Encuentro de Música Coral Navidad Fonseca na igrexa dos Xesuítas da Coruña, xunto ao coro e camerata da Escola Municipal de Música e o Coro Sancta María Maris. Para non romper a tradición, as tres corais uníronse para interpretar unha fermosa panxoliña.

Cantabile no encontro de Fonseca

Outra das novidades este ano prodúxose o día 22 de decembro. Unha das actividades paralelas da mostra Sonoro Empeño de AFundación foi un recital de panxoliñas,  diante da súa sede, na rúa, aproveitando a bonanza climatolóxica. Día de compras, día de xente na rúa e todas a pararse a escoitar a Cantabile. Unha gran experiencia que esperamos poder repetir no futuro e que se consolide.

https://twitter.com/Afundacion_org/status/1077881711998849024

https://afundacion.org/es/prensa/noticia/cantabile-en-las-actividades-paralelas-de-sonoro-empeno

O día 28, Cantabile por partida dobre. Pola mañá participamos no tradicional Encontro coa Cidadanía no Palacio de María Pita.

Pola noite ofrecemos o noso tamén tradicional concerto de nadal. A igrexa de San Nicolás chea para desfrutar das nosas panxoliñas. Grazas, como sempre, por acollernos. Pedimos á xente que nos segue e aos membros do Coro unha achega para o banco de alimentos de Caritas. E era día 28, Santos Inocentes. Non podía faltar a brincadeira e non faltou.

Cantiga de Nadal, unha obra do noso presidente, Xulio Loureiro

O día 3 de xaneiro tocaba #CantabileSolidario e botamos a tarde cos amigos e amigas da residencia de maiores Concepción Arenal. A rapazada foi a protagonista falando das súas cousas e, sobre todo, cantando. O recibimento foi moi agarimoso.

O Coro na residencia Concepción Arenal

E así foi rematando o nadal. Quedaba o campeonato de fútbol sala con participación masiva de rapaces e rapazas (e algún non tan rapaz), a tradicional comida no local e o reparto de agasallos do amigo invisibel. E non podían faltar as partidas ao Lobo. Un día distinto, de convivencia e de pasalo ben.

Xa estamos a traballar para o 2019, pero queremos despedir esta entrada cos nosos mellores desexos e un resumo de todo ano

15 anos de Cantabile

“Quince anos ten xa esta fermosa árbore, que naceu en abril de 2002. Quince anos de traballo musical e cultural continuado con nenos e mozos, con ilusión e cun nivel artístico contrastado que son razón máis que suficiente para manifestar por unha parte un profundo orgullo e por outra gratitude.

Orgullo, porque, desde unha posición humilde e traballadora, Cantabile converteuse xa nos inicios en referencia musical que foi alimentando o seu contrastado e prestixioso currículo. Participar nestes anos en óperas como Tosca, Carmen, La Bohème, Otello, A Frauta Máxica con grandes artistas internacionais; producir e representar a ópera Dido e Eneas ; cantar Parsifal coa prestixiosa Orquestra Filarmónica de Liverpool, no Compostela Organum Festival ou no aniversario da Fundación Barrié na Catedral de Santiago de Compostela con Carlos Núñez; en cidades como Pesaro, Bolonia, Roma (nesta última diante do Papa Benedito XVI), Viena, Altenburg, Salzburgo, Lisboa, Lourdes, Barcelona, Madrid e outras capitais españolas; gravar cinco discos de temática variada (clásica, galega, internacional) sendo un deles a banda sonora da película De Profundis non é casual. Sabemos que este grupo enorme de rapaces e rapazas da nosa cidade e o mellor director musical posible son quen de demostrar ese altísimo nivel musical.

Cantabile é un proxecto musical de referencia na nosa cidade evidente, pero que en realidade, vai máis alá da experiencia musical. Desde o principio, desenvolveu a sensibilidade de calidade nos seus coralistas e que se pode resumir nunha formación artística, integral e enriquecedora. Asociado á música en xeral e a clásica en particular, está a técnica do canto, a contextualización cultural das obras que se traballan, as visitas e concertos culturais, a convivencia de todos os membros de idades que se inician nos 8 anos ata a máis madura mocidade, a colaboración para un fin, o recoñecemento e admiración polo esforzo e traballo entre os seus compoñentes, a asunción de responsabilidades musicais e de xestión, etc. Un compendio, en fin, que etiqueta a Cantabile como ese feito musical como poucos e que temos tan preto. Como non imos estar orgullosos?

Podemos estar aínda máis orgullosos porque esta idea que se chama Cantabile, deu e dá froitos para a música constantemente, con excoralistas que continúan o seu labor musical e artístico como profesionais polo mundo adiante: Keko Martínez, Alberto Miguélez, Jesús Rodil, María Lueiro

Por outra parte, temos que proclamar unha gratitude tamén coral, dado que son varios os factores que provocaron e provocan que Cantabile sexa o que é. A primeira, refírese aos pais de todos os que estiveron e están aquí. Sen a súa confianza e sensibilidade pola formación dos seus fillos este proxecto non sería posible. Co seu esforzo por transmitir valores como formación, compromiso, implicación ou sacrificio, a calidade musical estivo sempre fortemente apuntalada. Nun paso máis profundo, algúns destes pais e tamén coralistas mozos interiorizaron Cantabile e formaron parte das diversas directivas que proporcionaron o imprescindible sustento loxístico do coro. O número deles afortunadamente é rico e todos aportaron o seu saber e o seu esforzo en beneficio de todos. É de xustiza destacalos na figura dos seus presidentes como representantes de todas as directivas precedentes: Millán Torre, Jesús Rodil, Pablo Méndez e Benito Freijido.

A segunda gratitude centrámola nas institucións que apoiaron e apoian esta realidade. É xusto citar ás Fillas da Natividade de María de Porta Real, que foron as que acolleron o nacemento de Cantabile; á Deputación da Coruña a través dos seus programas culturais e apoiando os nosos no Teatro Colón; ao Concello da Coruña, onde somos complemento de actos especiais como a recepción municipal anual, inauguración do Belén municipal ou as diversas actuacións ao longo do ano dentro do plan cultural municipal; a Amigos de la Ópera, que tanto valora o noso traballo nas óperas antes citadas; ás igrexas das Capuchinas e esta de San Nicolás. A fabulosa sonoridade destes dous templos nunca pasou desapercibida para o noso director, polo que, ano tras ano, desenvolvemos os nosos concertos importantes nestes dous recintos; pero este, o de aniversario, sempre aquí, pola solemnidade que esta Igrexa confire á música. Loxicamente, detrás dese acollemento amable e entusiasta está José Luís, o seu párroco, para o que a palabra grazas debe estenderse ao concepto de cariño.  Moitas grazas. Como é comprensible, Cantabile non podería facer moitas das cousas que fai de non ser por estes apoios imprescindibles. E imprecindibles son para nós tamén os grandes músicos que nunca dubidan en participar con nós nos proxectos especiais coma este concerto. Con eles as voces de Cantabile fanse máis grandes e fermosas.

Un agradecemento especial temos que dedicarllo á figura que aglutina todo isto desde o principio. Nin se entendería nin sería o mesmo Cantabile sen a súa sensibilidade, a súa sabedoría, a súa pedagoxía, o seu cariño. Con el naceu e con el crece, con el latexa este corazón. Ademais de sentirnos orgullosos e afortunados, temos que agradecerlle todos estes anos de dedicación abnegada aos rapaces no plano musical e no humano. O seu labor a todos os niveis é impagable. Como dixen antes, o mellor director posible para este Coro. Pido un caloroso aplauso para o artífice: moitas grazas, Pablo Carballido.

E por último, pero non menos importante (como se estila dicir), temos que dar as moitas grazas a todos vostedes, o público, porque coa súa presenza e entrega en cada cita, provocan o noso esforzo, a nosa ilusión, a nosa razón de ser. Vostedes son o noso obxectivo musical final, o noso apoio básico. A través dos concertos, da adquisición dos nosos discos e da subscrición de socios, é posible continuar avanzando e asentando este proxecto. En nome de todos os coralistas, músicos, director e xunta directiva que honro presidir, quero darlles as moitísimas grazas por dedicarnos a súa sensibilidade e cariño.

Sen máis, damos comezo a esta actuación, esperando que o programa que preparamos para este concerto sexa do seu agrado. Boas tardes e moitas grazas.”

Xulio Loureiro, presidente da Asociación musical e cultural Cantabile