Arquivos do autor: Coro Cantabile

Voltamos!

Ola de novo, #FamiliaCantabile!

Os últimos meses foron de moitas mudanzas e incertezas. Todo o mundo tivo que frear e tamén nós tivemos que aguantar sen facer o que máis nos gusta: cantar. Con todo, despois de que a situación causada pola COVID-19 mellorase (malia que aínda é necesario manter a precaución e cumprir as normas de hixiene e distanciamento social), Cantabile comezou a coller ritmo e reprogramar pouco a pouco as actividades que foran canceladas.

O primeiro que fixemos foi retomar os ensaios. Coas debidas medidas de seguridade e nun espazo amplo como é a igrexa das Capuchiñas da Coruña, organizamos varias sesións de traballo vocal en pequenos grupos para recuperarmos a forma. Despois de tanto tempo na casa, había moito que traballar!

Despois desta toma de contacto, non tardou en chegar a primeira actuación post-confinamento: o concerto Coruña Orgullosa, organizado polo Concello da Coruña con motivo do Orgullo LGTBI 2020. Así o recollía a concelleira de Igualdade, Yoya Neira:

Con máscaras, nun grupo reducido e nun exterior privilexiado, o castelo de Santo Antón, interpretamos obras variadas e deixamos claro que #OrgulloCantabile tamén é reivindicarmos a igualdade e o respecto para todas as persoas independentemente da súa orientación ou condición sexual.


Coas baterías cargadas tras este retorno, xa temos o ollo posto nos próximos eventos: o concerto de non-aniversario (non-aniversario? Que será, será…?) e a próxima edición da Noite das Candeas. Se as circunstancias o permitiren, verémonos axiña, familia! #CantabileNonPara

Feliz día das letras galegas

Hoxe é o Día das Letras Galegas, unha data sinalada nos nosos calendarios. Cada dezasete de maio recoñecemos a riqueza que supon ter unha lingua propia, homenaxeamos unha persoa que contribuiu especialmente á cultura galega e recoñecemos o seu labor; este ano é o turno de Ricardo Carvalho Calero.

Lembrar o pasado é tremendamente importante, porque sempre podemos extraer algunha lección de actualidade. Mais, ademais, en Cantabile estamos convencidos de que unha cultura viva é aquela que tamén escoita e apoia as persoas que contribúen a ela no presente. Así, co compromiso de que a música e os versos de artistas galegas actuais chegasen ben lonxe, embarcámonos en #PalabrasdeLuz. Por iso, nestes días atípicos en que a nosa idea non se pode materializar en concertos, compartimos convosco a gravación do álbum: clicade aquí.

Agradecemos inmensamente a Juan Durán, Maria Mendoza, Federico Mosquera, Fernando Buide, Eva Veiga, Antía Otero, Estíbaliz Espinosa, Carlos Negro, Baldo Ramos, Celso Fernández Sanmartín, Lucía Cernadas, Dores Tembrás, Anxo Angueira, Pilar Pallarés, María Lado, Manuel Rivas, Octavio Vázquez e Jesús Rodil que se embarcasen connosco nesta aventura. Por suposto, tamén sentimos orgullo e agradecemento por todos e todas as coralistas, o noso director, a nosa pianista, os membros da directiva e todas as persoas que fixeron posíbel algo así. Esperamos poder facer música xuntas canto antes! Entretanto, quedamos ben acompañadas pola música e a palabra.

Suavizando o confinamento. Libro Palabras de luz

Feliz día do libro!

Coa intención de que vos sintades acompañadas nestes momentos por nós e por todas as persoas que colaboraron co noso último proxecto, compartimos convosco o libro Palabras de luz, que ademais acaba de ser nominado aos Premios Martín Códax. Que mellor día que hoxe para amosarvos o noso orgullo?

Podedes ver e descargar o libro neste enlace

 

 

Coro Cantabile_Palabras de Luz

Moito ánimo para estes días!

Estrea de Palabras de Luz no Teatro Colón

Ola, #FamiliaCantabile! Esperamos que esta entrada vos encontre moi ben nas vosas casas. Estes días nós tamén tivemos tempo para pór a nosa conta de YouTube ao día e xa podemos compartir convosco todos os vídeos do concerto de presentación de Palabras de luz. Foi un día moi especial!

Deixámosvos con eles. Primeiro, o discurso da nosa presidenta, Lucía Cernadas, e o noso vicepresidente, Miguel Nó:

A seguir, as doce pezas que compoñen o traballo e que xa podedes escoitar nunha listaxe de reprodución. Clic!

E por último, un último vídeo que fala por si só: os vosos aplausos finais, mentres no escenario nos acompañaban as e os artistas que puideron asistir á estrea e escoitar por primeira vez o seu traballo. Máis unha vez, grazas, grazas, grazas!

Esperamos que rememorar este concerto vos guste tanto como a nós. Oxalá poidamos xuntarnos a cantar axiña. Unha aperta, #FamiliaCantabile!

Palabras de luz nos Martín Codax

Ola, #FamiliaCantabile!

Despois dun tempo sen actividade por esta páxina, estamos moi contentas de poder compartir convosco unha noticia: somos candidatas aos premios Martin Codax da música galega!

Estes premios, convocados pola asociación Músicas ao vivo, nacen co obxectivo de dar visibilidade e recoñecer a diversidade e a calidade artística das producións musicais e de todo o sector musical galego. A través dun proceso de votación que podedes consultar na súa web, escóllense as mellores candidaturas en categorías que van desde Coros e grupos vocais, a nosa, até Músicas urbanas, Jazz ou Reggae, entre moitas outras. Mais para concorrer (e aquí vén a outra parte interesante) tiñamos a oportunidade de apoiar a nosa candidatura con catro vídeos do noso proxecto; para isto, escollemos videos do concerto de estrea no Teatro Colón, que compartimos convosco por primeira vez aquí (grazas, coma sempre, ao magnífico traballo de Microrec). O resto de pezas e a experiencia dese día no teatro estarán disponíbeis en pouco tempo, mais polo momento, abramos boca!

Se nos acompañastes ese día, mil grazas! Aquí podedes revivilo. Se é a primeira vez, esperamos que gostedes! E desexádenos sorte!

 

Feliz 2020!

Parece mentira o rápido que pasa tempo. Estamos a punto de comezar o ano en que Cantabile fará a maioría de idade, voltando vista atrás, estamos felices de todo que levamos conseguido: nesta década viaxamos coa nosa música por Austria, Italia, Portugal, Francia España, gravamos varios discos, celebramos intercambios con outros coros, comezamos a tradición da Noite das Candeas, seguimos celebrando TODOS XUNTOS os aniversarios, o San Xoán ou os torneos de fútbol sala; realizamos varios concertos solidarios por ano, descubrimos de primeira man das obras de Händel, Charpentier, Fauré, Mozart, Haydn… replica watches

Sería imposíbel reunir aquí todo o vivido sen esquecer algo. Por iso, queremos deixarvos cun pequeno #10YearsChallenge, vendo dúas interpretacións dunha das obras máis divertidas do noso repertorio: The Lion Sleeps Tonight. A primeira delas, en Roma, na viaxe en que cantamos na Santa Sede; a segunda,  cantada por parte da Sección Xuvenil na V Noite das Candeas, hai apenas uns días. fake gold watches

Non se trata dun grande proxecto, nin de interpretacións perfectas. Porque imos crecendo, case ningunha das caras se repite. Aínda así, nos dous videos están as ganas de aprender e a alegría de saberse parte de algo grande: unha segunda familia que a música nos regala. Iso é a base de Cantabile. Best replica watch

Desexámosvos un feliz 2020 cheo de música en que poidades acompañarnos en moitos máis momentos. Grazas! #CantabileNonPara

Presentación de “Palabras de luz”: galería de imaxes

Aínda estamos procesando o emocionante que foi o concerto de presentación de Palabras de luz. Estamos enormemente agradecidas a todas as persoas que fixeron que este proxecto sexa hoxe unha realidade: artistas, coralistas e familias, o noso director Pablo Carballido, a pianista María Keilin, as institucións que nos apoiaron, as persoas encargadas do deseño dos materiais e de nos asesorar e, por suposto, ao público que encheu o Teatro Colón este 20 de novembro, nun acto tan especial. Agora toca sumerxirse na preparación do Nadal, mais tamén en facer chegar ás corais o noso traballo en forma de libro-CD durante as próximas semanas. Xa sabedes, Cantabile non para!
Deixámosvos cunha galería de imaxes do concerto, realizadas por Moncho Fuentes. Esperamos que vos gusten tanto como a nós!

#FamiliaCantabile: Jesús Rodil e Lucía Cernadas

Ola de novo! Como prometéramos, hoxe traémosvos unha sorpresa para culminar a presentación dos e das artistas que participaron en #PalabrasDeLuz. Trátase de Jesús Rodil e Lucía Cernadas que, como sabedes, son da casa!
Jesús cantou moitos anos en Cantabile e foi incluso presidente da asociación, aínda que agora desenvolve a súa vida profesional como cantante e compositor no estranxeiro. Por súa vez, Lucía todavía é coralista e, ao mesmo tempo, está finalizando os seus estudos e dá os seus primeiros pasos no mundo da escrita. Para nós é un pracer darlles a oportunidade de participar nun proxecto de tan alto nivel: no éxito de Jesús, podemos comprobar como a nosa función educativa e social dá os seus froitos; no caso de Lucía, vemos como se desenvolve ese proceso de formación de primeira man. Así que, con todo o #OrgulloCantabile do mundo, dámosvos máis detalles sobre eles:Cantante, compositor e director de coro, Jesús Rodil (A Coruña, 1986) comezou os seus estudos de piano con Marta Castanedo e de canto con Pablo Carballido del Camino (claro! ;)). Perfeccionouse en Italia con Monica Bacelli, Gloria Banditelli, Gregory Bonfatti e Ester Castriota e en Francia con Rosa Dominguez, Paul Triepels e Guy Fletcher. Obtivo o título Profesional de piano e o de trompeta no Conservatorio Profesional de Música da Coruña e o Título Superior de Composición coa cualificación de Matrícula de Honra no Conservatorio Superior da Coruña. Como bolseiro da Fundación Pedro Barrié de la Maza realizou un mestrado en composición coral e dirección de coro con Pier Paolo Scattolin e Francesco Carluccio no Conservatorio “G. B. Martini” de Boloña. En 2016 finalizou un mestrado en canto no mesmo conservatorio e obtivo o diploma de clavicembalo con Silvia Rambaldi. En 2017 obtivo o Diploma de Estudos Musicais (DEM) do CRR de París e o Diploma de Estudios Vocais (DEV) de Notre-Dame de París.
Como cantante, participou en grande cantidade de producións en Italia, Francia ou Alemaña, tanto como solista como membro de agrupacións da altura do Cappella Amsterdam, o Carnegie-Hall Chamber Choir ou o coro da catedral de Notre Dame. En 2018 participou incluso na gravación do álbum Himmelsmusik da recoñecida agrupación L’Arpeggiata, dirixida por Christina Pluhar, xunto con Phillipe Jaroussky e Celine Scheen.
Como compositor, Jesús produciu obras para diversos tipos de agrupcións. O coro Cantabile tivo a oportunidade de estrear o seu Ave Maria (2006) e Hércules (2008), unha peza con letra de Xulio Loureiro con motivo do recoñecemento da Torre de Hércules como Patimonio da Humanidade que resultou vencedora do concurso de composición Alexandre Bóveda.

Para cámara compuxo obras como o Cuarteto Kioto (2008) para frauta, violín, viola e violonchelo –vencedora do concurso de creación musical do Conservatorio Xan Viaño de Ferrol e estreada por profesores do conservatorio de Ferrol– ou Galerías (2014) para frautín solo, que foi estreada no Koninklijk Conservatorium Antwerpen por Aída López. Por último, entre as súas composicións para orquestra destacan Lugrís (2009) para gaita, orquestra de cordas, arpa, dous pianos e percusión –estreada pola orquestra do Conservatorio superior de música de A Coruña no auditorio Jofre de Ferrol e primeiro premio do XIX Concurso Internacional de composición para gaita Constantino Bellón– e Ria (2010) para orquestra sinfónica,  estreada pola orquestra do Conservatorio superior de música da Coruña na igrexa de Santo Domingo da Coruña. Para #PalabrasDeLuz, Jesús puxo música a Nacemento de Dores Tembrás e Voces baixo a Vía Láctea de Estíbaliz Espinosa.

Fotografía: Alba Carballal Muíños

Lucía Cernadas (Cecebre, Cambre, 1997)  comezou a escribir na súa adolescencia algúns relatos breves e, sobre todo, poesía. Neste ámbito, o ano 2015 gañou o primeiro premio no III Concurso escolar de poesía da Fundación Rosalía de Castro con Madrid-Atenas; no 2016 resultou vencedora do XXIII Certame literario de poesía e narración breve do concello de Cambre na modalidade de poesía por Retais de pseudoamor desgobernado; aliás, en 2017 gañou o XXIV Premio de Creación Literaria e Ensaio da Facultade de Filoloxía da Universidade da Coruña na modalidade de poesía en galego co texto “Hai un mes que non escribo”. En 2019, Lucía auto-publicou o poemario Sutura baixo o paraugas da non-editora Leite edicións.Na actualidade, Lucía estuda na Universidade da Coruña, onde realiza simultaneamente o Grao en Inglés e o Grao en Galego e Portugués: Estudos Lingüísticos e Literarios. Igualmente, cursa quinto de grao profesional na especialidade de Guitarra no Conservatorio Profesional de Música da Coruña. A isto engádese a presidencia de Cantabile desde marzo de 2019. Para #PalabrasDeLuz escribiu “Magnitude aparente”, que foi musicado por Octavio Vázquez.

Agora si que finalizan as presentacións do elenco de #PalabrasDeLuz. Aínda así, non perdades de vista as nosas redes, porque sabedes que #CantabileNonPara e menos ás portas dun concerto tan importante como a presentación deste proxecto!