Concerto de Solistas 2019

Este domingo vivimos unha fantástica tarde de música nas Capuchinas. O concerto de solistas de Cantabile serve para que cada ano aqueles coralistas que estudan canto ou tocan algún instrumento poidan mostrar o seu traballo a un público que non terían nos seus conservatorios ou escolas. Isto axúdaos a mellorar como músicos e gañar confianza e seguridade, pero é que ademais, fainos disfrutar moitísimo!

Nesta edición tivemos nada máis e nada menos que 26 obras do máis variado. Sofía Iglesias inaugurou a tarde ao violonchelo, seguida do “Caro Mio Ben” de LeonorDespois, Romeu e Jaime emocionaron ao público coa banda sonora de Forrest Gump ao piano e o trombón, mentres que Pablo Ares ao acordeón e Silvia ao piano interpretaron ritmos de baile. Irene tamén tocou unha fermosa danza, a dos “espíritos benaventurados” de Gluck. Delicado e cheo de sentimento coma sempre, Romeu repetiu ao piano con dúas pezas. Seguiu o “A Vucchela” de Marcos, a “Aria da cantata campesiña” de Nicolás ao violín e, para concluír a primeira parte do concerto, Samuel interpretou a “Yorkshire Ballad” ao bombardino.

Cando o público volveu aos seus asentos e os artistas recuperaron forzas cuns doces –que non podían faltar– Jaime enfrontouse a tres solos de trombón, para despois unirse a Romeu, Xiana e Nicolás e cantar “Esurientes” de Vivaldi, “Wiegenlied” de Mozart e “Ceibo, ceibo zuiñandí” de Guastavino. A seguir, Marta Duckworth dedicou á súa avoa o “Nocturno nº5” de Field e Carlota, xunto coa súa compañeira Uxía, interpretou o primeiro movemento do “Concerto en Sol m para dous cellos” de Vivaldi. Miguel No interpretou a última obra para un instrumento de vento do concerto cunha sonata para clarinete de Saint-Säens, e a el seguírono os violíns de Ramón e Manuel Segade e a viola de Mara. Lucía Cernadas tocou as “Diferencias sobre Conde Claros” á guitarra, para unirse despois a Mariana no dúo “Son nata a lagrimar” do Giulio Cesare in Egitto de Händel. O ramo da noite púxoo Martín co “Con te partirò” que popularizou Andrea Bocelli, un éxito rotundo!
Antes de finalizar o concerto, Ludmila Orlova recibiu unhas flores como recoñecemento á súa paciencia e esforzo como pianista acompañante de moitos dos mozos e mozas, mentres a Sección Xuvenil se preparaba para cantar unha selección de coros do musical “Les Miserables” que, a xulgar polos aplausos, tamén foron un acerto.

Como vedes, Cantabile non para nin un momento! As nosas filas están cheas de talento ano tras ano, así que só podemos sentir orgullo e esperar con ansia o próximo concerto de solistas.

Deixámosvos cunha galería de fotos. Vémonos nos escenarios!

El pase de diapositivas requiere JavaScript.

Dores Tembrás preséntanos “Nacemento”

Este sábado recibimos unha visita moi especial antes de comezar o ensaio. Dores Tembrás, poeta e nai dun dos nosos peques, veu falar sobre o texto que escribiu para o noso Proxecto da Luz. Aprendemos que “Nacemento” é un fermoso poema sobre a intimidade da nai co seu bebé recen nacido nas primeiras noites xuntos e que ese encontro é a luz que vertebra a composición. Mais, que é o Proxecto da Luz?

Desde hai case dous anos, Cantabile está a preparar unha iniciativa ambiciosa e ilusionante: un novo repertorio de música coral contemporánea en galego. Para iso, contou co traballo de doce poetas e seis compositores e compositoras que se uniron en torno ao concepto de ‘luz’. A luz une as palabras de Manuel Rivas, Pilar Pallarés, Baldo Ramos, Carlos Negro, Antía Otero, Dores Tembrás, Celso Fernández Sanmartín, Eva Veiga, María Lado, Anxo Angueira e Estíbaliz Espinosa e as harmonías de Juan Durán, María Mendoza, Fernando Buíde, Federico Mosquera e Octavio Vázquez. A luz integra neste elenco a Jesús Rodil e Lucía Cernadas, membros da familia Cantabile, continuando coa nosa razón de ser: dar oportunidades ás persoas que pasan polo coro. A luz cobrará miles de matices a través das voces dos nosos mozos e mozas cando as obras compostas en exclusiva para eles se materialicen nun libro CD que será distribuído a todos os coros de Galiza. A luz permitirá que un coro infantil e xuvenil dunha pequena cidade realice un gran proxecto en favor da modernización e dignificación da música coral en lingua galega. En pouco tempo poderemos dicir de novo que sentimos un inmenso #OrgulloCantabile.

Cantabileando 2019. Capítulo I: Sevilla

A xente que nos segue habitualmente sabe que, cando temos oportunidade, levamos a nosa música a calquera lugar. Este ano, ademais de estar planificando o noso #Cantabileando de verán, aproveitamos para aceptar a invitación de cantar en Sevilla na ponte de entroido.

O sábado 2 de febreiro madrugamos para citarnos na Casa dos Peixes, onde nos esperaba o autobús que nos levaría ao noso albergue en Sanlúcar la Mayor. Fixemos as paradas xustas porque non había tempo que perder: o día seguinte había concerto.

Iglesia de la Magdalena

O domingo de mañá entramos no centro da capital andaluza cos nosos novos uniformes de viaxe: a camiseta gañadora do concurso, ideada por Mariana e Valeria, e a suadeira co noso logo e os símbolos feitos por Alba Carballal: compañeirismo, aprendizaxe, e viaxes. O sol acompañounos na nosa visita ao barrio de Triana, onde, como non, cantamos en cada recanto.

Iglesia del Santo Ángel. Final de la Misa Cantada

Pouco despois dirixímonos á impoñente igrexa do Santo Ángel, onde cantamos a misa que, a xulgar polas palabras do seu párroco, Juan Dobado, debeu de ser un éxito: podemos voltar cando queiramos, incluso sen avisar!

Estreando uniforme xunto á Torre del Oro

Despois de repor forzas no xantar, visitamos a praza de España. Alí, quedamos impresionados co pavillón da Exposición Universal, as representacións nos muros de todas as provincias e as actuacións de flamenco en vivo e, despois de cantar unha vez máis –facendo #KaleBarroca–, paseamos polos xardíns de María Luisa e as rúas do centro da cidade. No noso paseo encontramos a antiga fábrica de Tabacos -actual sede da Universidade-, lugar en que se ambienta a ópera Carmen de Bizet, que contou coa nosa participación na súa última representación na Coruña. Canda a Torre del Oro esperábanos Serafín, o noso condutor, para levarnos de volta ao albergue.

Espectáculo de flamenco en Plaza de España

O luns madrugamos de novo para continuar visitando a cidade. Vimos o palacio municipal, a Giralda e parte da catedral e, xa con máis detalle, o impresionante Real Alcázar, un edificio cheo da historia e a arte das varias culturas que se asentaron en Sevilla na Idade Media. Cando terminou a visita dirixímonos ao comedor da facultade de Comunicación da Universidade de Sevilla e, como non, cantamos. Sen perder tempo voltamos ao centro para ver a igrexa do Salvador e a parte da catedral que nos faltaba xusto cando tiña lugar o tradicional baile dos seises, ademais de para un merecido tempo libre antes de voltar a Triana. Alí puidemos presenciar a grande tradición relixiosa deste barrio no traslado da imaxe do Cristo das Tres Caídas entre rúas ateigadas de xente; nelas, o silencio só se rompía pola intervención dunha numerosa banda de música.

 

Despois de todo isto, tocaba cear xuntos por última vez en La Gorda de las Delicias, un restaurante rexentado por Carmen, que desde o primeiro momento nos tratou estupendamente e fixo honra ao nome da casa: comemos a fartar!

Cea en La Gorda de las Delicias. Gracias, Carmen

Voltamos ao albergue despois de disfrutar da última vista de Sevilla de noite e despois dunha noite chea de partidas de lobo, xogos, conversa e preparativos, fixemos as maletas e almorzamos por última vez en Sanlúcar.  Despedímonos de Paco e as traballadoras do catering, que tamén nos atenderon á perfección, e emprendemos o camiño de volta, esta vez xa con máis calma.

Almorzo en Casa de Espiritualidad Juvenil Juan XXIII Sanlúcar la Mayor

Antes de chegar á Coruña deunos tempo de visitar a aldea de Candelario, mais enseguida continuamos a marcha porque, a medida que avanzabamos cara ao norte, chegaba a chuvia: esperábanos un temporal que nos fixo aminorar a marcha mais que non nos freou para chegar xa ben entrada a noite ao Palacio da Ópera.

Candelario (Salamanca)

Acababa así a primeira mostra de #Cantabileando2019, unha viaxe chea de arte, diversión, convivencia e, como non, música!

#CantabileNonPara

#Cantabileando2019Sevilla

#OrgulloCantabile

#FamiliaCantabile

RESULTADOS DO CONCURSO DE DESEÑO TÉXTIL CANTABILE

Xa temos gañadoras do concurso de deseño téxtil Cantabile:

Na categoría para a xente máis cativa, a gañadora foi Julia Mena Díaz.

Na categoría absoluta, resultou gañador o tándem formado por Mariana Boedo Buño e Valeria Mena Díaz.

Como mostra da calidade dos traballos presentados e como recoñecemento ao esforzo realizado, o xurado, presido por Lucía Cernadas, decidiu outorgar dous accesits ex aequo para Laura García Pereiro e Manuel Segade Bodelo.

En breve disfrutaremos dos novos deseños nos nosos uniformes.

Nadal 2018-2019 #NadalCantabile

Rematou un intenso ano 2018 cheo de compromisos e música e comeza o 2019, cargado de proxectos.

Antes de coller folgos para esta nova andadura, queremos amosarvos un resumo do #NadalCantabile 2018-2019

E comezou moi pronto. Unha das novidades deste nadal foi a participación do Coro, o 7 de decembro,  no prendido da iluminación de nadal, cun concerto xunto á famosa bóla da Marina, ateigada de xente.

O Coro Cantabile no prendido da iluminación de nadal

Continuamos  coa inauguración do nacemento artístico no Palacio de María Pita o día 14. Este ano rendíase homenaxe á poeta Luz Pozo Garza, que saudou agarimosamente aos nenos e nenas do Coro. Interpretarmos varias panxoliñas despois de que Luz Pozo nos deleitase cun poema seu.

O seguinte evento foi a nosa participación no XI Encuentro de Música Coral Navidad Fonseca na igrexa dos Xesuítas da Coruña, xunto ao coro e camerata da Escola Municipal de Música e o Coro Sancta María Maris. Para non romper a tradición, as tres corais uníronse para interpretar unha fermosa panxoliña.

Cantabile no encontro de Fonseca

Outra das novidades este ano prodúxose o día 22 de decembro. Unha das actividades paralelas da mostra Sonoro Empeño de AFundación foi un recital de panxoliñas,  diante da súa sede, na rúa, aproveitando a bonanza climatolóxica. Día de compras, día de xente na rúa e todas a pararse a escoitar a Cantabile. Unha gran experiencia que esperamos poder repetir no futuro e que se consolide.

https://twitter.com/Afundacion_org/status/1077881711998849024

https://afundacion.org/es/prensa/noticia/cantabile-en-las-actividades-paralelas-de-sonoro-empeno

O día 28, Cantabile por partida dobre. Pola mañá participamos no tradicional Encontro coa Cidadanía no Palacio de María Pita.

Pola noite ofrecemos o noso tamén tradicional concerto de nadal. A igrexa de San Nicolás chea para desfrutar das nosas panxoliñas. Grazas, como sempre, por acollernos. Pedimos á xente que nos segue e aos membros do Coro unha achega para o banco de alimentos de Caritas. E era día 28, Santos Inocentes. Non podía faltar a brincadeira e non faltou.

Cantiga de Nadal, unha obra do noso presidente, Xulio Loureiro

O día 3 de xaneiro tocaba #CantabileSolidario e botamos a tarde cos amigos e amigas da residencia de maiores Concepción Arenal. A rapazada foi a protagonista falando das súas cousas e, sobre todo, cantando. O recibimento foi moi agarimoso.

O Coro na residencia Concepción Arenal

E así foi rematando o nadal. Quedaba o campeonato de fútbol sala con participación masiva de rapaces e rapazas (e algún non tan rapaz), a tradicional comida no local e o reparto de agasallos do amigo invisibel. E non podían faltar as partidas ao Lobo. Un día distinto, de convivencia e de pasalo ben.

Xa estamos a traballar para o 2019, pero queremos despedir esta entrada cos nosos mellores desexos e un resumo de todo ano

Concerto de nadal. Campaña de alimentos

O vindeiro venres, 28 de decembro, ás 20:30 horas, ofreceremos o noso tradicional concerto de nadal na igrexa de San Nicolás.

A parroquia de San Nicolás, que tan xenerosa é sempre co Coro Cantabile, trasládanos, nesta ocasión, un problema de desabastecemento de alimentos para atender á xente necesitada.

Aproveitando que, como todos os concertos do Coro Cantabile na igrexa de San Nicolás son de balde, e as datas do nadal, que invitan á solidariedade e a compartir, solicitámosvos que, se asistides ao concerto, na medida das vosas posibilidades, traiades alimentos non perecedeiros. Para dar exemplo a directiva e os membros do Coro contribuirán tamén a que esta iniciativa sexa un éxito.

Algo máis que un coro: Isaac Martínez Bendayán en Palestina

O Coro Cantabile, nas convocatorias que fai para os seus eventos, adoita utilizar un formulario que serve tanto para controlar a asistencia como, para as persoas que non poden acudir, xustificar esta ausencia.

No último deles chamounos a atención a xustificación do noso coralista Isaac Martínez Bendayán. Indicaba que non podía asistir ao concerto e a súa causa era: “Misión humanitaria Palestina”.

Non deixamos pasar a oportunidade. Preguntámoslle a Issac por esta experiencia. Contounos que é a terceira vez que acude xunto a un equipo voluntario de cirurxía pediátrica para operar a nenos e nenas en Ramallah. Dispoñen dun centro hospitalario aceptable, pero non está dotado de persoal o suficientemente formado para afrontar intervencións deste tipo.

Abraiados pola xenerosidade de Isaac, propuxémoslle que dése unha charla á rapazada do Coro sobre a súa experiencia e el aceptou encantado.

A Palestine Children’s Relief Fund, ONG que xestiona o principal programa de cirurxía cardiaca pediátrica en Palestina, recibiu na última semana de outubro o equipo voluntario formado por profesionais sanitarios do Complexo Hospitalario Universitario da Coruña e do Hospital Universitário São João de Porto, Portugal, para operar a nenos e nenas con enfermidade cardíaca conxénita no complexo médico de Palestina en Ramallah.

O equipo estaba composto por Víctor Bautista Hernández, Jorge de Oliveira, Claudia Almeida, Iria Rivera, José González, Daniela C. Rosas, Sonia Teixeira, Jocelina Cabral, MIlagros LInares, Rita Jácome e o noso compañeiro Isaac Martínez Bendayán.

Seguimos esta apaixoante experiencia a través do diario da Missao Joazinho na Palestina 2018

Neonatos de 3,5 kg. , nenas de seis anos, nenos con síndrome de Down…Todos e todas con enfermidades coronarias que, de non ser polo altruísmo dos nosos heroes e as nosas heroínas, verían o seu percorrido vital moi diminuído, tanto no tempo como na calidade.

Estamos xa ansiosos de escoitar as vivencias de Isaac nesta fermosa aventura.

IV Noite das Candeas

Por cuarto ano consecutivo celebramos a nosa Noite das Candeas Cantabile. Nesta ocasión, valeu como despedida dun verán moi intenso para o Coro. A Noite das Candeas é un concerto especial, diferente. Rerpertorio distinto, protagonistas distintos, a igrexa iluminada coas candeas…

A Noite das Candeas convertiuse tamén no escaparate da nosa Sección Xuvenil, que dirixe Lucía Cernadas. Os rapaces e rapazas de Cantabile preparan o seu propio repertorio e ensaian, dirixen e interpretan. Hai canteira!

Matías Cobo, o noso novo pianista, participou tamén como solista interpretando unha peza moi emotiva, o tango Adios Nonino, de Astor Piazzola, que levantou ao público dos seus asentos.

A nosa querida igrexa das Capuchinas quedou pequena para toda a xente que quixo asistir ao concerto.

Para rematar, queremos indicar que este concerto, tan especial para nós, foi dedicado a Carlos de las Heras, voluntario amigo das Capuchinas e amigo de Cantabile tamén, que nos deixou recentemente.